અમન સેહરાવતનો ઐતિહાસિક પ્રદર્શન, પેરિસ ઓલિમ્પિકમાં જીત્યો બ્રોન્ઝ મેડલ

પેરિસ ઓલિમ્પિક 2024માં ભારતને છેલ્લે રેસલિંગમાં મેડલ મળ્યો છે. અમન સેહરાવતે પેરિસ ઓલિમ્પિકમાં બ્રોન્ઝ મેડલ જીતતા ઇતિહાસ રચ્યો છે. સેહરાવતએ 57 કિલોગ્રામ વજન કેટેગરીમાં પોતાના પ્રથમ ઓલિમ્પિક ડેબ્યુમાં જ પૃઅર્ટો રિકોના રેસલરને 13-5 થી હરાવી આ સિદ્ધિ મેળવી. આ મેડલ સાથે પેરિસ ઓલિમ્પિકમાં ભારતના કુલ મેડલની સંખ્યા 6 થઈ ગઈ છે, જેમાં 5 બ્રોન્ઝ મેડલ છે.

આ સ્પર્ધાની શરૂઆતમાં પૃઅર્ટો રિકોના રેસલરે અમનને મેટની બહાર કાઢીને 1 પોઈન્ટ મેળવ્યો હતો, પણ અમને તરત જ પાછો વળીને લેગ એટેક માર્યો અને 2 પોઈન્ટ મેળવી લીધા. પ્રથમ પીરિયડ દરમિયાન બંને વચ્ચે તીવ્ર મુકાબલો જોવા મળ્યો. ક્રૂઝે 3-2ની લીડ લીધી, પણ અમને ફરીથી 2 પોઈન્ટ લઈને 4-3ની લીડ મેળવી. બીજા પીરિયડમાં અમને આ લીડને વધારી 6-3 કરી દીધી અને અંતે 13-5થી વિજય પ્રાપ્ત કર્યો.

21 વર્ષના અમન સેહરાવત માટે આ ઓલિમ્પિકનો ડેબ્યુ યાદગાર રહ્યો. તેમણે પ્રથમ બાઉટમાં મેસિડોનિયાના વ્લાદિમીર ઇગોરોવને 10-0થી હારાવ્યા હતા અને ત્યારબાદ ક્વાર્ટર ફાઈનલમાં પણ અલ્બાનિયાના જેલિમખાન અબાકરોવને 12-0થી હરાવી સેમીફાઇનલમાં પ્રવેશ કર્યો હતો. સેમીફાઇનલમાં, વિશ્વના નંબર 1 જાપાનના રેઇ હિગુચિ સામે હાર થઈ હતી, જેણે અમનને 10-0થી હરાવ્યો.

અમનની આ સફળતા ખાસ આથી પણ છે કે 57 કિલોગ્રામ કેટેગરીમાં ભારતે સતત 2 ઓલિમ્પિક મેડલ જીત્યા છે. ટોક્યો ઓલિમ્પિકમાં, રવિ દહિયાએ પણ આ કેટેગરીમાં સિલ્વર મેડલ જીત્યો હતો. અમન અને રવિ બંનેએ દિલ્હીના છત્રસાલ સ્ટેડિયમમાં સાથે તાલીમ લીધી હતી, અને અમન રવિને પોતાનો ગુરૂ માનતા હતા. આ વખતે, અમને નેશનલ ટ્રાયલમાં રવિ દહિયાને હરાવીને પેરિસ ઓલિમ્પિક માટે ક્વોલિફાઇ કર્યું હતું.