ગુજરાત સરકારે આરોગ્ય સેવાઓને આવશ્યક સેવા જાહેર કરી, The Essential Services Maintenance Act, 1981 હેઠળ હડતાલ પર નિયંત્રણ
Aakriti
રાજ્ય સરકારે આરોગ્ય સેવાઓને આવશ્યક સેવા તરીકે જાહેર કરવાનો મહત્વપૂર્ણ નિર્ણય લીધો છે. જે અંતર્ગત આરોગ્ય કર્મીઓ વારંવાર હડતાલ પર જઈ દર્દીઓની સેવા પર અસર કરશે તો તેમની સામે કડક પગલાં લેવામાં આવશે. આ નિર્ણય The Essential Services Maintenance Act, 1981 હેઠળ લેવામાં આવ્યો છે.
રાજ્યમાં ફિક્સ-પે આરોગ્ય કર્મચારીઓ હડતાલ પર જાય તો તેમની સેવા સમાપ્ત કરવાની વિચારણા થઈ રહી છે. આ પહેલા પોલીસ, ઉર્જા જેવા મહત્વના વિભાગો માટે આવશ્યક સેવાઓનો અમલ કરાયો હતો, હવે આરોગ્ય વિભાગ માટે પણ આ જ નીતિ અપનાવવામાં આવી છે.
થોડા દિવસ પહેલા રાજ્યભરના હજારો આરોગ્ય કર્મચારીઓએ ગાંધીનગરમાં ધરણાં અને પ્રદર્શન કર્યું હતું. જેમાં પંચાયત લેબ ટેક્નિશિયનોના બે દિવસીય આંદોલન બાદ ગુજરાત રાજ્ય આરોગ્ય કર્મચારી મહાસંઘના નેજા હેઠળ 7 અલગ-અલગ કેડરના આરોગ્ય કર્મચારીઓ પણ જોડાયા હતા.
ગુજરાત રાજ્ય આરોગ્ય કર્મચારી મહાસંઘના પ્રમુખ રણજીતસિંહ મોરીએ જણાવ્યુ કે, MPHW, FHW, MPHS, FHS, TMPH, THV અને જિલ્લા કક્ષાના આરોગ્ય સુપરવાઈઝરોના પડતર પ્રશ્નો હજી સુધી ઉકેલાયા નથી.
સરકારના નિર્ણયને પગલે હવે આરોગ્ય કર્મચારીઓની વારંવાર હડતાલ કરવાની તકો ઘટી જશે. જો સરકાર અને આરોગ્ય કર્મચારીઓ વચ્ચે સકારાત્મક સંવાદ થાય તો આરોગ્ય સેવાઓ પર અસર ન પડે અને દર્દીઓ માટે યોગ્ય ઉકેલ મળી શકે.
