ગુજરાતમાં સરકારી શાળાના શિક્ષકોની ગેરહાજરીના અનેક કિસ્સા સામે આવી રહ્યા છે. તાજેતરમાં બનાસકાંઠા જિલ્લાની એક સરકારી શાળામાં 8 વર્ષથી ગેરહાજર રહેતી શિક્ષિકાનો મામલો ચર્ચામાં હતો. આ વચ્ચે, ખેડા જિલ્લામાં પણ એક સમાન કિસ્સો પ્રકાશમાં આવ્યો છે, જેમાં એક શિક્ષિકા છેલ્લા 1 વર્ષથી શાળામાં હાજર નથી અને વિદ્વાન વિભાગમાંથી NOC લીધા વગર જ વિદેશમાં સ્થાયી થઈ ગયા છે. આથી, બાળકોના શિક્ષણ પર નકારાત્મક અસર પડી રહી છે.
ખેડા જિલ્લાના નડિયાદ તાલુકાની હાથજ પ્રાથમિક શાળામાં ફરજ બજાવતી શિક્ષિકા સોનલ પરમાર 1 સપ્ટેમ્બર 2023થી ગેરહાજર છે. તેમણે કોઈપણ પ્રકારની NOC લીધા વિના અમેરિકા જવાનું નક્કી કર્યું અને ત્યારબાદ શાળામાં હાજર નથી રહી. આ મામલે પ્રાથમિક શિક્ષણ વિભાગ દ્વારા સોનલબેનને નોટિસ પાઠવી છે, પણ હજુ સુધી તેમણે કોઈ જવાબ આપ્યો નથી. આ શાળામાં ધોરણ 1થી 8માં 564 વિદ્યાર્થીઓ અભ્યાસ કરે છે.
સોનલ પરમારની ગેરહાજરીની જાણકારી મુખ્ય શિક્ષક દ્વારા જિલ્લા પ્રાથમિક શિક્ષણ વિભાગને આપવામાં આવી છે, જેથી તેમની ગેરહાજરીને લઈ પગલાં લેવામાં આવી રહ્યા છે. શિક્ષકોની ગેરહાજરીના સતત કિસ્સાઓ સામે આવતા, શિક્ષણમંત્રી કુબેર ડિંડોરે કડક પ્રતિક્રિયા આપી છે. તેમણે જણાવ્યુ કે, બનાસકાંઠાની પ્રાથમિક શાળામાં શિક્ષકનો વિદેશમાં પગાર લેવો ગંભીર બેદરકારી છે. ગેરહાજર શિક્ષક તેમજ તેમની હાજરી પૂરનાર આચાર્ય સામે પણ યોગ્ય કાર્યવાહી કરવામાં આવશે. રાજ્યભરમાં આવા શિક્ષકોની તપાસ કરીને તેમને ઘેર ખસેડવા માટેના પગલાં લેવાશે.
(હેતાલી શાહ, ખેડા)
