મુંબઈ: હોલિવૂડની પ્રસિદ્ધ સેલિબ્રિટી કિમ કાર્દશિયન હાલમાં અનંત અંબાણી અને રાધિકા મર્ચન્ટની લગ્ન સમારોહમાં ભાગ લેવા મુંબઈ આવી હતી. આ દરમિયાન કિમે ભારતીય કપડાં પહેર્યા, ભારતીય ખાવાનુ મજા માણી, અને ઘણા ભારતીય સેલિબ્રિટીઝ સાથે મુલાકાત કરી. પરંતુ વતનમાં જતાં પહેલાં કિમે એવું કંઇક કર્યું કે જેના કારણે તેને લોકોના ગુસ્સાનો સામનો કરવો પડ્યો.
ગણેશ મૂર્તિ સાથે પોઝ પર ગુસ્સે થયા લોકો
કિમે આ લગ્ન સમારોહની કેટલીક તસવીરો તેના ઇન્સ્ટાગ્રામ અકાઉન્ટ પર શેર કરી હતી. આ તસવીરોમાં કેટલાક ફોટા તે ભગવાન ગણેશની મૂર્તિ સાથે લઈ રહી હતી. આ ફોટાઓમાં કિમ અજીબ પોઝ આપતી દેખાઈ હતી, જે લોકોને બિલકુલ પસંદ નહીં આવ્યું. કેટલાક લોકોએ કિમ પર હિંદુ સંસ્કૃતિના અપમાનનો આરોપ લગાવ્યો અને સોશિયલ મીડિયા પર તેને ખૂબ ટ્રોલ કરવી શરૂ કરી. જ્યારે કિમને આ બાબતે ખબર પડી, ત્યારે તેણે તરત જ આ તસવીરો ડિલીટ કરી.
ફોટા અને ટ્રોલિંગ
ડિલીટ કરેલી તસવીરોમાં, એક ફોટામાં કિમ ગણપતિની મૂર્તિ સાથે પોઝ આપી રહી હતી અને બીજી ફોટામાં તેણે ગણપતિની મૂર્તિના મસ્તક પર બંને હાથ મૂકીને પોઝ આપ્યો હતો. આ બીજી તસવીરને જોઈને લોકો ખૂબ ગુસ્સે થયા. એક સોશિયલ મીડિયા યુઝરે સીધા મુકેશ અંબાણીને ટેગ કરીને કહ્યુ કે, "તમારા મહેમાનને કેટલીક સમજણ શીખવો."
ડેમેજ કન્ટ્રોલ
કિમની ટીમે આ ફોટા ડિલીટ કર્યા બાદ પણ આ મામલે કિમ અથવા તેની ટીમ તરફથી કોઈ સત્તાવાર નિવેદન આપવામાં આવ્યું નથી. પરંતુ લોકોનો ગુસ્સો શાંત કરવા માટે કિમે ઇસ્કોન મંદિરમાં લીધેલી કેટલીક તસવીરો તરત જ શેર કરી. અમેરિકામાં જતાં પહેલા કિમ અને તેની બહેન ક્લોએ ઇસ્કોન મંદિરની મુલાકાત લીધી હતી અને ત્યાંના બાળકોને ભોજન પણ પૂરું પાડ્યું હતું. આ તસવીરો જોતા લોકોનો ગુસ્સો થોડોક શાંત થયો.
