કેન્દ્રીય કેબિનેટે નેશનલ હેલ્થ મિશનને પાચ વર્ષ માટે મંજૂરી આપી, કાચા શણના MSPમાં પણ વધારો

કેન્દ્રીય કેબિનેટે આગામી પાંચ વર્ષ માટે નેશનલ હેલ્થ મિશન (NHM) ચાલુ રાખવાની મંજૂરી આપી છે. આ મહત્વપૂર્ણ નિર્ણય સાથે, કેબિનેટે 2025-26ની માર્કેટિંગ સીઝન માટે કાચા શણના લઘુત્તમ ટેકાના ભાવ (MSP)માં પણ વધારો કર્યો છે.

બુધવારે કેન્દ્રીય મંત્રી પીયૂષ ગોયલે આ જાહેરાત કરી હતી. પત્રકાર પરિષદ દરમિયાન તેમણે જણાવ્યું કે નેશનલ હેલ્થ મિશને છેલ્લા દશ વર્ષમાં આરોગ્ય ક્ષેત્રે ઐતિહાસિક પ્રગતિ હાંસલ કરી છે. 2021-22 દરમિયાન 12 લાખથી વધુ આરોગ્ય કર્મચારીઓ NHMમાં જોડાયા હતા અને ભારતે આ મિશન હેઠળ કોવિડ-19 મહામારી સામે સફળતાપૂર્વક લડત આપી હતી.

MSPમાં 6%નો વધારો

કેબિનેટે 2025-26ની માર્કેટિંગ સીઝન માટે કાચા શણનો MSP 5,650 રૂપિયા પ્રતિ ક્વિન્ટલ નક્કી કર્યો છે, જે અગાઉના દર કરતા 315 રૂપિયા વધુ છે. આ વધારો 6%નો છે, જે કાચા શણના ઉત્પાદકો માટે ઉચિત નફો સુનિશ્ચિત કરે છે.

પીયૂષ ગોયલે જણાવ્યું કે નવી MSP અખિલ ભારતીય ભારિત સરેરાશ ઉત્પાદન ખર્ચના 66.8% નફાને સુનિશ્ચિત કરે છે. 2014-15માં કાચા શણનો MSP 2,400 રૂપિયા હતો, જે હવે 5,650 રૂપિયા થયો છે, એટલે કે 2.35 ગણો વધારો થયો છે.

આ નિર્ણયથી ખેડૂતોને ફાયદો

કેન્દ્રીય મંત્રી પીયૂષ ગોયલે કહ્યું કે સરકારે આ નવા પગલાંથી ખેડૂતોના જીવનમાં સુધારો લાવવાનો પ્રયાસ કર્યો છે. MSPમાં થયેલા વધારો ખેડૂતોને ઉત્પાદન ખર્ચનો યોગ્ય વળતર આપવા અને તેમના નફામાં વૃદ્ધિ લાવવા માટે ઉપયોગી થશે.

આ નિર્ણય વડાપ્રધાન નરેન્દ્ર મોદીની અધ્યક્ષતામાં થયેલી કેબિનેટ બેઠકમાં લેવામાં આવ્યો હતો. આરોગ્ય મિશન અને કાચા શણના MSP બંને મુદ્દાઓ ભારતના વિકાસ અને ખેડૂતોના કલ્યાણ માટે મહત્વપૂર્ણ છે.