પહેલગામ આતંકી હુમલા બાદ ભારત સરકારે પાકિસ્તાન પર વધુ એક કડક પગલું ભર્યું છે. માહિતી અને પ્રસારણ મંત્રાલયે 8 મે, 2025ના રોજ તમામ OTT પ્લેટફોર્મ અને ડિજિટલ મીડિયા સેવાઓને પાકિસ્તાનમાં બનેલી વેબ સિરીઝ, ફિલ્મો, ગીતો, પોડકાસ્ટ અને અન્ય સ્ટ્રીમિંગ સામગ્રી તાત્કાલિક બંધ કરવાની સલાહ આપી છે. આ નિર્ણય રાષ્ટ્રીય સુરક્ષા અને જાહેર વ્યવસ્થાને ધ્યાનમાં રાખીને લેવામાં આવ્યો છે. મંત્રાલયે જણાવ્યું છે કે, પાકિસ્તાન આધારિત રાજ્ય અને બિન-રાજ્ય તત્વો સાથેના સંબંધો ધરાવતા આતંકવાદી હુમલાઓના કારણે આ પગલું જરૂરી બન્યું છે. આ પગલાં હેઠળ, YouTube, Netflix, Amazon Prime Video, Disney+ Hotstar સહિતના તમામ પ્લેટફોર્મ્સ પર પાકિસ્તાનથી આવતી સામગ્રી પર પ્રતિબંધ લાગુ થશે. આ નિર્ણય ઓપરેશન સિંદૂરના ભાગરૂપે લેવામાં આવ્યો છે, જે પાકિસ્તાનમાં આતંકવાદી ઠેકાણાઓ પર ભારતના પ્રતિસાદ તરીકે શરૂ થયું હતું.